A música non podía faltar na programación da trixésimo cuarta edición da Mostra do Encaixe de Camariñas Deputación da Coruña, na que Fillas de Cassandra, Soledad Vidal e Budiño ofrecerán concertos o mércores, o xoves e o domingo, respectivamente.
Para a apertura, entre os desfiles de ‘PequEncaixe’ e ‘Grandes Firmas’ do mércores 16 de abril, Sara Faro e María SOA inaugurarán a programación musical desta edición e tras dar a coñecer tres novos sinxelos: Hibernarse, Arderse e Quebrantarse.
Este dúo musical galego combina a tradición oral e musical galegas co feminismo, a mitoloxía grega e sons modernos. A súa proposta escénica e calidade artística aposta pola recuperación das melodías tradicionais e novas letras. As súas composicións transitan da emotividade ao desenfado, acadando unha conexión entre as distintas xeracións que as seguen aló onde van.
O xoves, 17 de abril ás 20:15 horas, Soledad Vidal ofrecerá ‘Cantares Atlánticos’, un espectáculo que viaxa a través da poesía galega e imaxes evocadoras, con cancións como María Soliña ou Lela. Nesta viaxe conmovedora, a artista, natural de Camelle, acompañada do pianista Aurelio Virbay, homenaxea a todas esas mulleres que, máis alá da dor e a perda, constrúen as súas vidas con valentía, nun retrato dunha Galicia que é capaz de mirar a súa sombra, a súa Negra Sombra para poder celebrar a vida.
Clausurará a XXXIV Mostra do Encaixe de Camariñas Deputación da Coruña Xosé Manuel Budiño, logo dos derradeiros desfiles desta edición, que darán comezo ás 19:30 horas.
Un dos grandes expoñentes da música galega, é artista de orixe e universal polo seu destino, viaxeiro convencido, creador incansable, innovador por convicción e soñador de melodías imposibles. Budiño é un artista atípico; é difícil atopar a alguén que esperte tanta admiración entre os seus. Inspírase nos pequenos sabores da música de raíz, pero sempre coa intención de crear unha música con estilo propio.
GL_ES 
ES 
EN