Julia de la Cal, a cesteira e deseñadora que hai detrás de ‘La Parabólica’, será unha das artesás que conformen a novidosa sección ArtEncaixe, que se estrea no XXX aniversario da Mostra do Encaixe Deputación da Coruña que se celebrará do 8 ao 12 de outubro de 2021.
‘La Parabólica’ centra a súa actividade na cestería, concretamente nos servizos de cestería: dende a creación de pezas de uso cotián coma una cesta ou un bolso, mobiliario e iluminación, ate cestería aplicada ao paisaxismo e ao interiorismo, instalacións artísticas, intervencións no espazo, obradoiros e actividades docentes.
En 2004, Julia de la Cal trasladouse a Barcelona para estudiar Deseño Gráfico e Industrial na Escola Massana, onde tamén cursou o posgrao de Artesanía e Deseño. En Barcelona desenvolveu a súa carreira coma deseñadora e brand manager durante máis de 10 anos.
A finais de 2015 volveu a Galicia, onde obtivo a Carta de Artesanía e continúa traballando tanto no campo do deseño como no da cestería. Na actualidade colabora con diferentes entidades e profesionais, desenvolvendo obradoiros participativos e impartindo cursos de cestería tradicional e contemporánea, participando en feiras e encontros dentro e fóra de Galicia e cultivando o seu propio vimbio.
Para Julia de la Cal, participar na XXX Mostra do Encaixe de Camariñas Deputación da Coruña é “todo un orgullo”, unha oportunidade de “amosarlle ao mundo as pezas feitas a man, elaboradas dun xeito único e transmitir as emocións que o Encaixe lle outorga á manufactura”, subliña.
