O deseñador de Viana do Bolo, Jorge de Álvarez, dará na XXXI Mostra do Encaixe de Camariñas Deputación da Coruña o paso ao desfile de Grandes Deseñadores despois de ser o gañador do certame de Noveis Deseñadores no ano 2018.
“Quero que os noveis vexan que un rapaz coma min, que estivo do seu lado no concurso, agora pode estar coas grandes firmas e iso é moi importante porque as metas poden conseguirse a base de traballo e sacrificio”, explica o deseñador.
Colección Royalty gañadora na Mostra 2028
Jorge de Álvarez, que está a vivir uns últimos meses moi atarefados tras ser o encargado de vestir ás Tanxugueiras para a súa actuación no concurso que daba acceso a Eurovisión, sinte “felicidade porque na Mostra conten comigo para ser parte do xurado e poder presentar a miña nova colección”. “É un orgullo porque foi o lugar que me veu nacer, por así decilo”, confesa.
A colección que traerá á Mostra trata “sobre as guerras persoais que sufrimos a maior parte das persoas e que non se ven pero están aí, o vestiario está inspirado en indumentarias militares de distintas épocas”. Aclara que “está feita desde o mes de novembro, non ten nada que ver co horrible conflito bélico que se está a vivir en Ucraína”.
