Para contribuír á promoción turística do municipio, e aproveitando a presenza en FITUR, o Concello abriu unha ventá ao paraíso de Camariñas en pleno centro de Madrid, contratando insercións publicitarias nas grandes pantallas dixitais de Callao e Gran Vía e nas do frecuentado Mercado de San Miguel.
A inserción publicitaria consiste, por unha banda, nun vídeo de 10 segundos no que, baixo o lema ‘Camariñas Sorprende’ poden verse as festas, a paisaxe e a gastronomía que ofrece Camariñas e, pola outra, como imaxe fixa, o cartel da XXXIV Mostra do Encaixe de Camariñas Deputación da Coruña.
“Así, tanto os milleiros de persoas que día a día pasean pola Gran Vía e a praza de Callao como os visitantes que acoden ao Mercado de San Miguel, un dos máis destacados da capital do país, poderán facer un primeiro achegamento ao paraíso que temos en Camariñas”, explica a alcaldesa, Sandra Insua.
A rexedora aclara que “o obxectivo desta acción publicitaria é o de continuar a promocionar o turismo en Camariñas fora das nosas fronteiras, xunto á Mostra do Encaixe, para atraer un maior número de visitantes ao longo de todo o ano”. “Os resultados dos últimos anos foron moi bos e por iso repetimos”, afirma.
GL_ES 
ES 
EN