A XXXI Mostra do Encaixe de Camariñas será o marco da presentación oficial ao público da cervexa ‘Serpent’, un proxecto de César de León, natural de Dor (A Ponte do Porto) e criado en Xaviña, que, como o seu nome indica, ten un vínculo indiscutible con Camariñas e a súa historia.
“O proxecto nace no 2000 pero, por temas económicos, non puiden sacala adiante ata o 2021, ano no que comezamos a montar a fábrica cervexeira nunha nave do polígono de Carballo, para no mes de novembro iniciar a fabricación”, conta César de León.
Explica que polo momento hai tres tipos de cervexas ‘Serpent’: “unha lager, a típica cervexa que bebe todo o mundo; unha pale lager, moi similar á lager pero cambian as maltas; e unha franciscana, que é unha ipa con bastantes notas florais e sabor a lúpulo”. Ademais, avanza que “queremos sacar en breve unha tostada e unha sen glute”.
A presentación destas cervexas no pavillón da Mostra será o xoves 14 de abril ás 18:30 horas na zona de cafetería, da que tamén se encargará o propio César de León e na que poderá degustarse calquera das tres ‘Serpent’ durante todo o evento.
A súa idea de futuro é “trasladar a cervexeira a Camariñas”. O que non cambiará é a esencia do proxecto xa que “o meu obxectivo non é facer unha gran distribución, a miña cervexa está deseñada para ser un produto gourmet, non quero vender volume, quero vender calidade”.
A día de hoxe calquera persoa pode atopar a cervexa ‘Serpent’ en: Camariñas, no restaurante O Bico, no Club Náutico de Camariñas, no Marina, no bar Ariño, no restaurante O Rojo; e n Vimianzo, en Carballo, no faro de Finisterre ou no faro de Carnota.
GL_ES 
ES 
EN