O talento da Costa da Morte foi protagonista en todo o material divulgativo que se creou para promocionar a XXXIV Mostra do Encaixe de Camariñas Deputación da Coruña. O elemento básico sobre o que xirou o resto de pezas, o cartel, este ano foi obra da ilustradora ceense Laura Suárez.
Laura Suárez, nada en Dumbría pero afincada en Cee, ven de ser recoñecida recentemente co XIX Premio Castelao de Banda Deseñada da Deputación da Coruña polo seu álbum ‘A Raíña Cadaver’, estudou Belas Artes na Universidad Politécnica de Valencia e cursou un máster na escola Elisava de Barcelona, especializándose en ilustración e cómic.
“Diego Alonso púxose en contacto conmigo para facer o cartel deste ano, transmitíndome o concepto da campaña do Mar de Piques e a idea da nasa mesturada coa almofada. Comecei coa liña dese elemento principal e xa, a partir de ahí, preparei a composición da ilustración e a gama cromática”, explica.
Sobre a selección de cores sinala que “baseouse na mestura do tradicional e o moderno. As cores cálidas da almofada, suaves marróns e fortes vermellos, contrarrestan co azul do mar e da nasa, un azul ecléctico que mostra un día de vento e tormenta, tan profundo que só se pode albiscar unha silueta do Faro Vilán”. “A idea é representar a tempestade, pero tamén a calma, a solidez e o movemento dunha tradición con tanta historia, que non ten medo a experimentar cos novos tempos e modernizarse”, salienta.
GL_ES 
ES 
EN