A recoñecida firma Aveda, con orixes en Minneapolis (Minnesota, EEUU) e que actualmente está integrada no grupo Estée Lauder será a encargada do servizo de peiteado que se porá ao dispor dos deseñadores e deseñadoras na XXXIV Mostra do Encaixe de Camariñas Deputación da Coruña.
A marca, que se afianzou como líder mundial na comercialización de cosméticos producidos a través de plantas e produtos botánicos, encárgase do peitado en desfiles por todo o mundo, como a New York Fashion Week, sendo esta a primeira vez que formará parte dun desfile en España.
Aveda desprazará a Camariñas, do 16 ao 20 de abril, un equipo multidisciplinar de entre 8 e 10 persoas. A través da colaboración cos deseñadores e deseñadoras, tanto do desfile de Grandes Deseñadores como do concurso de Noveis Deseñadores, a súa intención é aplicar as últimas tendencias de peiteado e, sobre todo, facer un traballo moi dinámico.
A concelleira da Mostra, Encarna Liñeiro, destacou que “para nós é unha alianza moi importante xa que supón dar un paso máis na consolidación da pasarela da Mostra como unha das referencias no ámbito da moda a nivel nacional”.
GL_ES 
ES 
EN