O spot trata sobre un “celebrity” que, coa axuda da súa parella, anda na procura dun chaqué para asistir a unha exclusiva gala da moda. Despois de percorreren varias tendas de alta costura, os protagonistas non atopan nada que lles convenza e deciden deixar de buscar. 

Para relaxarse e tomar un respiro deciden dar un paseo pola Costa da Morte recalando finalmente en Camariñas. Na súa visita achéganse, como non podía ser doutro xeito, os lugares de Vilán, Trece e Monte Branco. Dando unha volta polo porto, deciden comer nun restaurante do concello. É alí onde descobren en internet o Museo do Encaixe. Aló se dirixen finalmente para coñecer de que se trata. Percorren xuntos toda a exposición maravillados do que as palilleiras de Camariñas son capaces de crear. Cando están a punto de rematar a visita, atopan o chaqué adecuado que o noso protagonista lucirá nesa gala tan importante na que estaba citado. Un completo traxe de home que, a diferencia co resto dos vestidos, luce uns impresionantes e únicos detalles propios de Camariñas.

A continuación vese o protagonista saíndo dun luxoso coche na alfombra vermella do evento e rodeado de decenas de admiradores que quedan impresionados co traxe provinte de Camariñas con eses detalles de encaixe que o seu ídolo luce na gala da moda.