30 anos na vangarda da moda
Deputación da Coruña

¿Onde está o encaixe no cartel da XXX Mostra?

Neste post, a nosa experta palilleira, desvelanos tódolos secretos do smoking do protagonista do cartel da XXX Mostra do Encaixe de Camariñas. Aínda que non o pareza este traxe está cheo de detalles de Encaixe de Camariñas.
Redacción
Redacción

Equipo de prensa da Mostra do Encaixe de Camariñas

Share on whatsapp
Share on facebook
Share on linkedin
Share on twitter

Recentemente estreado este 2020 e xa entramos de cheo no 30 aniversario da Mostra do Encaixe de Camariñas, polo que este ano debía ser especial, rechamante e rompedor. En definitiva, que había que dar un xiro de 360º ao que viñamos facendo en canto a márketing visual. Imos aló entón para desvelarvos todos os secretos de onde se atopa o encaixe nun traxe tan elegante como o que leva Damián Álvarez no spot da XXX Mostra do Encaixe de Camariñas.

Jorge, o xerente de Alonso Moda probando o smoking a Damián Álvarez

Planificado e estruturado todo o que se quería facer en canto a anuncio e cartel promocional, puxémonos ao choio para vestir de domingo ao modelo seleccionado, que non podía ser outro que Damián Álvarez, modelo internacional e como non, da Costa da Morte.

Valoráronse diversos traxes masculinos de calidade, pero buscábase un que fora verdadeiramente elegante e que non tivese unha tea moi brillante pero tampouco opaca e que non parecese, como se di moitas veces, un cantante de orquestra, pois non era o que se buscaba para esta ocasión. E atopámolo no impresionante stock que posúe a impresionante tenda de moda masculina Alonso Moda de Carballo.

Sabendo de antemán o que o equipo creativo quería transmitir co cartel da XXX Mostra do Encaixe, pensouse en múltiples deseños de encaixe que puidesen adaptarse ao traxe escollido. Pero necesitábase algo elegante, cautivador e que fose un encaixe típico da zona, propio de Camariñas, pero que non perdese o toque de artesanía característico da Vila das Palilleiras. Así que o encaixe seleccionado foi o coñecido popularmente en Camariñas como o “Acordeón”, debido á similitude que ten co fol dese instrumento musical.

Esta labor é un caso particular, porque non podemos dicir que é unha puntilla en sí, co seu pé, centro e puntilla, senón todo un conxunto, xa que os seus palillos vanse entrelazando desde o extremo dereito ao esquerdo, todo de corrido, dando a forma final composta por “barras” paralelas horizontais de par enteiro, separadas por filas de rombos de par enteiro volteado unidos entre si.

Todo o encaixe realizado para vestir ao noso modelo, o top model da Costa da Mortre Damián Álvarez, fíxose da mesma maneira: cunha almofada típica de Camariñas, cos palillos de madeira de buxo, co deseño picado a man sobre cartón contracolado e coa arte característica da nosa Camariñas. Utilizouse fío metalizado negro, achegando un brillo elegante, cautivador e moderno a un encaixe de deseño clásico e tradicional.

O encaixe poderíase poñer no propio traxe, pero pensouse que era moito máis versátil aplicalo en complementos, para achegarlle a todo aquel que vise tanto o anuncio, como o cartel promocional, ideas para as súas propias vestimentas e tamén para demostrar que o Encaixe de Camariñas non é só cousa de mulleres.

Finalmente decidiuse facer os zapatos, a paxariña, os xemelgos, a faixa e o pano para a lapela ou solapa en castelán. Tanto aos zapatos como á paxariña, fíxoselle un deseño exclusivo para adaptalo á forma desexada, pero utilizando o mesmo deseño tradicional do “Acordeón”. Doutra banda, os xemelgos, de prata de 1ª lei, aplicóuselles o encaixe coa axuda dunha prensa e a faixa, personalizouse aplicando o encaixe con seda salvaxe natural.


Por último, e non menos importante, quíxose cambiar o modelo de pano para a lapela, pois o típico é utilizar un pano como tal de encaixe ou tea sen máis, pero postos a dar un xiro quixémolo facer do todo, e utilizáronse dúas follas de encaixe negro de algodón colocadas nos pliegues que forma o pano, un pequeno detalle, pero totalmente distinto a todo o visto ata a data.

Esta web utiliza cookies. Podes ver aquí a Política de Cookies. Se continúas navegando estás aceptandoa.    Ver
Privacidad

#IinformMyself