A xornada de clausura da XXXIII Mostra do Encaixe de Camariñas Deputación da Coruña serviu para coñecer aos gañadores do XXX concurso de Noveis Deseñadores. O primeiro premio, entregado pola alcaldesa de Camariñas, Sandra Insua, recaeu nas mans de Cristina Gamallo, que conquistou ao xurado profesional coa súa colección Camino.

O responsable da planta de Vilán de Stolt Sea Farm, José Figueroa, entregoullle o premio a Driade, de Laura Araujo, que quedou en segundo lugar; mentres que a colección Farrapos de Uxía Loureiro, que recibiu o premio da responsable de relacións institucionais de Frigoríficos de Camariñas, Verónica Canosa; acadou o terceiro posto. O premio á “Colección máis comercial”, entregado pola presidenta da Asociación de Empresarios e Promoción Turística de Camariñas, Olga Campos, foi para Miriam de Rio, con Elas. 

Nesta edición repartíronse un total de 4.500 euros en premios divididos do seguinte xeito: un primeiro premio de 2.100 euros, un segundo de 1.200 euros, un terceiro de 600 euros, e o premio á “Colección máis comercial” tamén de 600 euros. 

Optaron a estes galardóns un total de 35 mozas e mozos que están dando os seus primeiros pasos no mundo da moda. A procedencia dos noveis deseñadores foi moi diversa, formados nas mellores escolas a nivel estatal.

O xurado estivo composto polas seguintes deseñadoras e deseñadores: Modesto Lombra, Charo Carrillo, Ana Cabranes, Esteban Freiría, Felipe Santamaría, Miriam Cartagena e Francisco Basteiro. 

Na clausura, a concelleira do Encaixe, Encarna Liñeiro, afirmou que “A Mostra conserva a esencia do que foi sempre. É artesanía é tradición, identidade e amor polo propio. Pero agora é moito máis. É un evento único, en Galicia e en todo o país, unha pasarela de referencia a nivel nacional, que leva o nome de Camariñas polo mundo!.

No seu discurso fixo un repaso polos diferentes slogans do evento desde que ela asumiu a concellería. “Quixen que os propios lemas de cada edición amosasen esta nova realidade, comecei con ’30 anos na vangarda da moda, facendo fincapé na traxectoria; ao ano seguinte quixemos saber se encaixabades no paraíso; na anterior edición deixamos claro que ‘Camariñas está de moda’ porque somos a capital nacional da moda en Semana Santa; e aínda con todo isto ‘Camariñas Sorprende’, Camariñas e a Mosstra sempre teñen algo novo e diferente que ofrecer”.