A Mostra do Encaixe de Camariñas Deputación da Coruña e a facultade de Ciencias da Comunicación da Universidade da Coruña (UDC) estableceron un convenio polo que os alumnos e alumnas do grao de Comunicación Audiovisual poderán ter como prácticas a realización dos vídeos da segunda Mostra Virtual.
Hoxe, mércores 3 de febreiro, tivo lugar unha reunión telemática de presentación e organización do proceso de gravación das pezas audiovisuais do certame de Xóvenes Deseñadores, que se publicarán en Semana Santa. No encontro participaron as alumnas, Rosario Mourille, Noelia Fernández e Ángela Vanessa); o seu titor, Iván Puentes; a concelleira da Mostra, Encarna Liñeiro; e a directora do evento, Dolores Lema.
As gravacións comezarán en breve e levaranse a cabo en diferentes localizacións do Concello de Camariñas coa finalidade de promocionar a aplicación do encaixe na moda e a vangarda a través das coleccións dos Xóvenes Deseñadores e á súa vez as paisaxes do municipio. Ditas gravacións faranse aplicando un estrito protocolo de seguridade seguindo as recomendacións das autoridades sanitarias.
Actualmente a organización da Mostra do Encaixe está a buscar modelos de Camariñas para participar nos vídeos e calquera persoa que estea interesado ou interesada en participar pode comunicalo por correo electrónico en dolores.lema@camarinas.net ou no teléfono 653 265 529.
GL_ES 
ES 
EN