A recoñecida firma nacional Devota&Lomba, asidua nos desfiles de Grandes Deseñadores da Mostra do Encaixe de Camariñas Deputación da Coruña, decidiu aplicar o encaixe camariñán na súa nova colección, ‘Bellas Artes’, que presentará o luns 9 de setembro na Real Academia de Bellas Artes de San Fernando, dentro da iniciativa ‘Madrid es Moda’.
Para a elaboración das pezas, inspiradas en ‘La Primavera’, o retrato metafórico e maneirista de Giuseppe Arcimboldo, Devota&Lomba encargou un encaixe único, deseñado especialmente para este motivo, realizado en diferentes cores e cun denominador común: a esencia floral. A aplicación nos vestidos busca darlles volume e aportar unha sensación 3D.
Así, a firma, liderada por Modesto Lomba, con raíces galegas, concretamente no Grove, aposta unha vez máis polo encaixe de Camariñas como elemento distintivo e de vangarda nas súas coleccións.
