History

Historia da Mostra do Encaixe de Camariñas

Lenda, historia ou maxia?

Hai quen di que veu dos Países Baixos, outros falan dunha italiana náufraga… ou será que aquí sempre fomos mestras do fío? Ti escolles a túa historia!

Din algúns historiadores que o encaixe de Camariñas podería ter chegado aquí grazas ao comercio entre os portos galegos e os Países Baixos nos séculos XVI e XVII. Outros contan unha historia moito máis novelesca: unha moza italiana foi rescatada tras un terrible naufraxio en Camariñas e, como agradecemento, ensinou ás mulleres do pobo a arte do bolillo, espallando este saber por toda a Costa da Morte.

E logo está a teoría máis poética e enxebre: que foron as propias mulleres de Camariñas, traballadoras e inquedas, as que desenvolveron este arte e o levaron máis aló das nosas terras, porque se algo temos os galegos é ese espírito viaxeiro e soñador que nos fai buscar sempre novos horizontes.

Cal destas historias é a verdadeira? Algunhas teñen máis base histórica ca outras, pero deixámosche a ti a liberdade de escoller a que máis che guste. O que está claro é que, dende aquela, o encaixe forma parte da nosa identidade, e hoxe imos contarche como naceu a Mostra do Encaixe de Camariñas, o evento que mantén vivo este legado único.

Fotos históricas Mostra Encaixe
A inauguración da 1ª Mostra

1991, o ano no que

todo mudou

Corría a Semana Santa de 1991 e en Camariñas cociñábase algo grande. Ninguén sabía aínda que aquel evento marcaría un antes e un despois na historia do encaixe, pero a primeira Mostra estaba a piques de nacer. Bautista Santos, alcalde da vila, xunto con Fernando González Laxe, ex-presidente da Xunta, o conselleiro de Industria Juan Fernández e Salvador Fernández Moreda, presidente da Deputación da Coruña, foron os encargados de inaugurar este soño feito realidade.

Historia da Mostra do Encaixe de Camariñas

Creatividade

a fío solto!

Se algo define á Mostra do Encaixe, ademais da tradición e a moda, é a súa aposta pola creatividade en todas as súas formas. Desde sempre, os carteis foron auténticas obras de arte, cheas de cor, simbolismo e innovación. Cada edición sorpréndenos cun deseño que capta a alma do encaixe e de Camariñas, fusionando historia e modernidade cun toque rompedor. Aquí, o cartel non é só para mirar… é para presumir!

Historia da Mostra do Encaixe de Camariñas

E como a Mostra non deixa de reinventarse, nos últimos anos botouse ás pantallas con spots promocionais que son pura maxia audiovisual. Desde Fíos de Lenda, que nos mergullou entre o mito e a realidade, ata Camariñas, un mar de piques, que captura a esencia do encaixe e do mar nunha historia vibrante, cada vídeo fai que a paixón pola Mostra traspase fronteiras. Porque aquí non só se vive o encaixe… tamén se conta, se sinte e se espalla polo mundo enteiro!

De "Isto desaparecerá"

a facer Historia

Se as nosas bisavoas levantaran a cabeza! Cando os xornalistas lles preguntaban polo futuro do encaixe, moitas delas dicían sen dúbida: “Isto algún día desaparecerá”. Pero non podían estar máis erradas. O encaixe resistiu, evolucionou e brillou como nunca. O Concello de Camariñas soubo ver o potencial desta arte milenaria e puxo en marcha a Mostra, converténdoa nun escaparate mundial para as palilleiras. O que naceu coma un intento por dignificar o traballo das nosas mulleres acabou converténdose nun símbolo de identidade e orgullo. Hoxe, décadas despois, o fío segue sen romperse. E seguirá tecéndose, entre tradición, paixón e futuro.

transparent-overlay
en_GBEnglish (UK)
This website uses cookies. You can see the Cookies Policy here. If you continue browsing you are accepting it.    See
Privacidad